Kutafakari kutoka Lk 11,
1-13
Baada ya kusema ni nini
inapaswa kuwa kipaumbele maishani mwetu, siku ya leo Yesu anatufundisha jinsi
ya kusali na kwa nini kusali. Basi, tunataka kutafakari kuhusu thamani kubwa ya
sala ya Bwana, yaani, “Baba Yetu” na ahadi ambayo tunaalikwa kuchukua kutokana
na sala hii. Kama muhtasari wa njili sala hii inadhihirisha utambulisho wa
wakristo nasi tunaposali, tunataka kumaanisha kwamba sisi ni wamoja na wana wa
familia moja, yaani familia ya watoto wa Mungu.
Kupitia sala Yesu aliwapa
wanafunzi wake mfano muhimu wa kuishi kwa sababu kwake kusali kulikuwa tabia yake
ya kawaida. Katika mazungumzo hayo kutoka moyo kwa moyo, Yesu anamwita Mungu
kama “Aba” na kuishi kwa uhusiano wa kina naye, kweli kama mtoto mdogo na baba
yake. Basi, kusali ndivyo hivyo, uhusiano wa baba na mwana. Tunaposali tunahisi
Mungu karibu sana nasi. Sala inaufungua moyo wetu kwa kuzitambua na kuzipokea
zawadi zake. Ikiwa hatusali imani yetu inakuwa dhaifu daima. Ingawa wanafunzi
wa Yesu walijua sala nyingi za dini yao nafsi yao ilihitaji uhusiano wa ndani.
Walipomwona Mwalimu kusali waligundua mara njia kamili ambayo ilikosa kwa sala
yao. Hivyo mmojawapo alimwambia, “tufundishe!”
Wakati Yesu alipowafundisha wanafunzi
wake kusali, aliwakabidhi maneno aliyotokana na uhusiano wake na Baba na kuwakumbusha
kuhusu haja ya kuwa na tabia kamili, yaani tabia ya mwana anayemwomba Baba kwa
imani. Hii ni tabia ya kujisalimisha mikononi mwa Huyo anayejua mahitaji ya
wana kabla ya wamwombe kitu. Yesu hakuhitaji kusali kwa sababu ni Mungu aliye
mmoja na Baba; hata hivyo, alisali sana. Kwake mtu anapaswa kusali sio tu
anapohitaji bali kwani hii ni sehemu muhimu ya maisha yake, kama vile kula
chakula, kunywa maji ama kupumua.
Sehemu ya kwanza ya sala hii
ni utambulisho wa ubaba wa Mungu, ambao unaonyeshwa kupitia utunzaji na wema
wake. Huu ni mwaliko wa kulitukuza jina la Mungu, yaani, “Baba yetu… jina lako litukuzwe!” na mambo yote yakujayo baada ya maneno
“Baba yetu” yanayategemea maneno haya. Kulitukuza jina la Mungu ni kumpa Mungu
utukufu wake kwa kufanya mapenzi yake kama Yesu alivyo, hasa aliposema “Chakula changu ni kufanya mapenzi ya Baba
yangu.” Ni lazima kufanya mapenzi ya Mungu ili Ufalme wake utokee duniani
kama mbinguni.
Tunapaswa kumwelekea Baba huyo
kwa imani kwa kuwa na uhakika kwamba tumepokea sana. Ni muhimu pia kuwa na
uvumilivu na kuusubiri wakati wa Mungu. Tunaomba kwa ajili ya mkate na ya msamaha
na ya upatanisho na ulinzi. Kulingana na Maandiko matakatifu, “kutokana na wema
wake tumepokea neema juu ya neema”. Ushuhuda huu ni uthibitisho wa utunzaji wa
upendo wa Mungu anayeshiriki zawadi zake na wana wake, kwa kutarajia kwamba
tufanye vivyo hivyo kwa ajili ya wengine ili undugu kati yetu uwe maonyesho ya
ubaba wake.
Tunaposala Sala Baba Yetu tunaonyesha kwamba tunafikiria
sio mahitaji yetu tu bali ya wengine pia. Sala hii inatufundisha kuomba kwa
ajili ya lililo muhimu sana, yaani, “mkate wa kila siku”, kwa sababu tunapaswa
kupigana na kila aina ya ukusanyaji na ubadhirifu wa chakula ambao unauharibu undugu,
kwa kuwafanya maskini na wenye njaa wateseke. Kuhusu mambo haya Baba Mtakatifu
Francisco asema: “Ulaji umetuongoza kutumia chepesi pamoja na ubadhirifu wa
chakula cha kila siku... Tunapaswa kukumbuka kwamba chakula ambacho sisi hutupa
takatakani ni kama tulikuwa tumeiba kutoka meza ya walio maskini na wenye
njaa.”
Kwa Mt. Yohana
Calabria, sala “Baba Yetu ni Injili
kwa ufupi. Matatizo yote yapaswa kufikiriwa na kusomeka kwa maelewano na ubaba
wa Mungu.” Ikiwa tunasema “Baba Yetu” ni kwa sababu tunasadiki kwamba sisi ni
ndugu wa wengine wengi. Mungu hawabagui watu na hamsahau yeyote wa wana wake. “Kikundi
chochote cha kidini kinapoanza kufikiri na kutenda kama kwamba Mungu yuko nao
tu na sio watu wengine huko ni kumbinafsisha Mungu.” Sala kama hivyo haiwezekani
kumpendeza Yeye kwa sababu haiwafikirii ndugu wengine.
Katika sala yetu mara
nyingi hatupokei yale tunayoomba. Ni kwa sababu gani? Labda
hatuombi ipasavyo. “Mstari wa mwisho wa injili hii unaonyesha nini cha kuomba
na nini tutakachopewa, yaani Roho Mtakatifu”. Ndiye Yeye zawadi kubwa ambaye
Baba anatupa naye anasali ndani yetu ili tusali kwa njia kamili. Roho huyo
anatuhakikishia kwamba “sala ya kweli haimlazimishi Mungu kuyabadili mawazo
yake ili ayafanye mapenzi yetu.” Basi, Mungu hatupatii daima yale tunayomwomba,
bali anatupatia daima tunayohitaji, kulingana na mapenzi yake. Pamoja na kuwa
njia ya kusali sala ya Baba Yetu ni njia ya kuishi. Tunaalikwa kuishi kwa undugu
kutokana na uzoefu wa ubaba wa Mungu na kuwa na tabia kamili katika ushusiano
wetu naye, yaani kuwa na tabia ya wana, kwa sababu mtu ambaye haishi kama mwana
hapati kutenda kama ndugu. Roho Mtakatifu atusaidie kuishi maneno ambayo
tunayasema tunaposali “Baba Yetu.”
Fr Ndega
Nenhum comentário:
Postar um comentário